Samaya Dristi

कमल पौडेल अथक
पोखरा २०, असोज
शनिवार नेपाली कांग्रेस कास्की क्षेत्र नं ३, प्रदेश २ को प्रथम प्रदेश सम्मेलन । प्रमुख अतिथि केन्द्रीय सहमहामन्त्री बद्री पाण्डे । कार्यक्रम स्थल गोल्डेन हाउस पार्टी प्यालेस पोखरा जिरोकिलोमिटर । समय शनिवार विहान ११ बजे ।
निम्तो यही थियो सारा कांग्रेसजनहरुलाई सामाजिक संञ्जालमा पोष्ट गरिएको । पार्टीका सहमहामन्त्री बद्री पाण्डे नै कार्यक्रममा आउने भन्ने निम्तो पाएपछि अधिकांश कांग्रेस कार्यकर्ता र मिडियाकर्मीहरु कार्यक्रम स्थलमा पुगे ।
कार्यक्रमका प्रमुख अतिथि भनिएका बद्री पाण्डे आउन केही ढिलो भएपछि कार्यक्रम सुरु गरियो । प्रदेश २ का सभापति जीवनाथ पौडेलले सभाध्यक्षको आशन ग्रहण गरे । सचिव वावुराम भण्डारीले प्रदेश सभापति शुक्रराज शर्मालाई प्रमुख अतिथिको आशन ग्रहण गराए । कांग्रेसका कार्यक्रममा अतिथि वोलाएर गएका शुक्रराज कहिल्यै तल बस्न जान्दैनन् ।
उनलाई उद्घोषकले आसन ग्रहण गराउन पर्दैन, उनी सिधै मञ्चमा गएर बस्ने उनको ज्याद्रो बानी रहेको कास्की कांग्रेसका नेता कार्यकर्तहरु गुनासो गर्छन् । अब यहाँ त उनलाई नै प्रमुख अतिथि भनेर आयोजकले उद्घोषण गरेपछि मञ्चमा रहेका उनी आशन ग्रहण नगर्ने कुरै भएन । तर उनलाई आयोजकले नै प्रमुख अतिथि वनाए वा उनले आफै मलाई अब प्रमुख अतिथि वनाउनुपर्छ भने त्यो भने थाहा भएन ।
तव मञ्च भन्दा तल वसेका कांग्रेस कार्यकर्ताहरु कानमा खासखुस गर्न थाले । एक जनालाई प्रमुख अतिथि भन्दै बोलाएर अर्कैै व्यक्ति किन प्रमुख अतिथि ? यो जिज्ञासा अधिकांश सहभागीले गरे । केही जुरुक्क उठेर हल वाहिर निस्किए । केहीले भित्रै कानेखुसी गर्दै मञ्चासिन कांग्रेस नेता कार्यकर्ताहरुको भाषण सुनेर बसे ।
मञ्चमा प्रदेश सभापति शुक्रराज शर्मा सँगै संविधान सभा सदस्य एवं केन्द्रीय सदस्यमा मनोनित शारदा पौडेल पनि रहेकी थिइन् । पछिल्लो समयमा कांग्रेस नेताहरुमा आफ्नो पदीय हैसियत के हो र के कस्ता कार्यक्रममा सहभागी हुने भन्ने कुरो नै नेताले चेत पाउन छाडिसकेका छन् ।
हुन त संविधान सभा सदस्य भइसकेकी शारदा पौडेल प्रदेशको टिकट लिएर हारेर बसेको इतिहास पनि ताजै छ । बोलाएपनि नबोलाएपनि मञ्चमा गएर बस्ने बानी उनको पनि कमजोरी रहेको कास्की कांग्रेसका नेताहरु वताउँछन् । पौडेल कार्यक्रम थाहा पाएर गएकी हुन् वा निम्तो पाएर गएकी हुन् सो कुरा उनले आफै जानून् । तर कांग्रेसको विधान अनुसार प्रदेश सभापति शुक्रराज शर्मा भन्दा दुइ तह माथि रहेकी शारदा पौडेल नै सो कार्यक्रमको प्रमुख अतिथि बनाइनु पर्ने थियो । तर आयोजकले मञ्च मै रहेकी शारदा पौडेललाई अपमान गर्दै शुक्रराज शर्मालाई प्रमुख अतिथि वनाए । केन्द्रीय सदस्य शारदा पौडेल पनि मञ्चमा नै बसेर भाषण सुनिरहिन् ।
तर यता सो कार्यक्रममा प्रमुख अतिथि भनेर निम्तो बाँडिएका कांग्रेसका केन्द्रीय सहमहामन्त्री बद्री पाण्डे एक हप्ता अघि नै चीन भ्रमणमा रहेका छन् । उनी चीन भ्रमणमा रहँदा रहँदै उनलाई प्रमुख अतिथि भन्दै सामाजिक संञ्जालमा निम्तो पोष्ट गरिएको रहेछ । किन चीनमा भएका व्यक्तिलाई प्रमुख अतिथि बनाएर निम्तो पोष्ट गरियो यो विषय रोचक र जालसाझी पूर्ण रहेको छ उपस्थित सहभागीहरुले भने ।
यहाँ बोको देखाएर बुढीबाख्रीको मासु बिक्री गर्ने काम भयो, यसरी कार्यक्रम हुन्छ भनेको भए हामी यो कार्यक्रममा आउने थिएनौं कार्यक्रममा सहभागी केही कांग्रेस कार्यकर्ताहरुले भने । पछिल्लो समयमा कास्की कांग्रेसमा निष्ठा, विचार र सिद्यान्तको भन्दा पनि गुटको राजनीति झांगिएको कांग्रेस समर्थक एवं शुभेच्छुकहरुको तर्क छ, पार्टी भित्र मर्यादाका कुरा भन्दा पनि गुटका कुरा गर्ने र कसले कसलाई सिध्याउने भन्ने खेल कास्कीमा बढी नै देखिन्छ ।
उता चीन भ्रमणमा रहेका पाण्डे यता कार्यक्रममा आउने कुरै भएन । दाइ त एक हप्ता अघि चीन भ्रमणमा जानुभएको हो, उहाँ अवको तीन दिनपछि नेपाल आउनु हुन्छ पाण्डेका खलक भाइ रुपेश पाण्डेले भने ।
पछिल्लो समयमा राजनीतिमा सबै भन्दा बढी गुटको झाल झांगिएको कास्की कांग्रेसका कार्यक्रममा केन्द्रीय नेता आउने निम्तो बाड्ने र कार्यकर्ता बटुलेर भाषण गर्ने काम यसअघि पनि हुँदै आएका छन् ।
यस अघि केही दिन अघि उनै प्रदेश सभापति शुक्रराज शर्माले केन्द्रका अर्थमन्त्री डा प्रकाशशरण महत कार्यक्रममा आउने भनेर निम्तो बाँडेका थिए । सो कार्यक्रममा अर्थमन्त्री महत आएनन् ।
दिन भरी कुरेर बस्दा अर्थमन्त्री नआएपछि बेलुकीपख केन्द्रीय उपसभापति धनराज गुरुगलाई कार्यक्रममा डाकेर सम्मेलनको उद्घाटन गरेको भुल्न हुँदैन सहभागीहरुले भने । अर्थमन्त्री कार्यक्रममा प्रमुख अतिथि बोलाएर किन आएनन् अर्थात् उनी आउने भनेपछि कार्यकर्ता जोर्न सजिलो हुन्छ र भाषण गर्न पाइन्छ भनेर हो सो कुरा आयोजक स्वयंमले जानून् कार्यक्रममा सहभागी पुराना कांग्रेसहरुले भने ।