Samaya Dristi

कमल पौडेल अथक
पोखरा २०, फागुन
पूर्व राजा ज्ञानेन्द्र शाहको स्वागतमा सोमवार पोखराको सडकमा पञ्चायतकालिन झल्को देखियो । पोखराको गणेशटोल, भैरवटोल, मोहोरियाटोल र विन्ध्यवासिनी क्षेत्रमा पञ्चायतकालिन झल्को देखिएको हो ।
भीमसेन टोलमा श्री ५ महाराजाधिराज ज्ञानेन्द्र वीरविक्रम साहदेवको जय होस् भन्दै तुल टाँगिएको थियो । पोखराको गणेशटोलदेखि विन्ध्यवासिनीसम्मको सडक किनारामा मानिसहरुको ताँती थियो ।
उनीहरु हातमा फूल गुच्छा र बुके लिएर पूर्वराजा ज्ञानेन्द्र शाहको स्वागतमा पर्खिरहेका थिए । सडकमा पञ्चेवाजा बजिरहेको थियो । पूर्व राजाको सुरक्षार्थ शसस्त्र प्रहरी र जनपथ प्रहरी तैनाथ थियो । साथमा शिव सेना नामको राजावादी नागरिक सेना पनि पूर्व राजाको सुरक्षामा खटिएको थियो ।
दिउसो २ वजे पूर्वराजा गणेशटोल आउने भनेर सामाजिक सञ्जालमा हवला दिईएको थियो । सो थाहा पाएका पत्रकारहरु क्यामेरा, कलम र डायरी लिएर उक्त स्थानमा पुगेका थिए । सँगै सामाजिक सञ्जालमा भ्यु वटुलेर पेट पाल्दै आएका युट्युवरहरु पनि क्यामेरा वोकेर पूर्व राजाको स्वागतको तस्वीर कैद गर्न सडकमा उभिइरहेका थिए ।
करीव २ घण्टा ढिलो गरी दिउसो ४ वजे पूर्वराजा ज्ञानेन्द्र गाडीवाट सडकमा ओर्लिए । तव उनलाई नागरिकहरुले धमाधम हातमा लिएको फूल गुच्छा र बुके थमाउन थाले ।
त्यसपछि नागरिकहरुले राजा आउ देश वचाउ, हाम्रो राजा हाम्रो देश प्राण भन्दा प्यारो छ भन्दै नारावाजी गरेका थिए । राजालाई फूल थमाउन नागरिकको भीड लागेपछि सुरक्षाकर्मीलाई सुरक्षा दिन हम्मे हम्मे परेको थियो ।
सो अवसरमा पूर्व राजालाई फूल थमाउन राप्रपा मात्र नभएर कांग्रेस, एमाले र माओवादीको जिम्मेवार पदमा रहेर काम गरिसकेका नेताहरु सडकमा लाइनवद्ध भएर वसेका थिए ।
पछिल्लो समयमा देशमा नागरिकले ल्याएको लोकतान्त्रिक गणतन्त्रमाथि केही सीमित नेता र तिनका झोले झाम्टेहरुले हालीमुहाली गर्दै आएको स्वंय नागरिकको गुनासो छ ।
सानो देशमा सात प्रदेश वनाएर नेता व्यवस्थापन र आफ्ना आसेपासे पोष्ने थलो वनाएको प्रति पनि नागरिकहरु उत्तिकै रुष्ट देखिन्छन् ।
नेताहरुको जीवन शैली र व्यवहार प्रति स्वयं नागरिकहरु नै सन्तुष्ट छैनन् । हिजो निरंकुश भनिएका राजा भन्दा अहिलेका छोटे राजाहरु झन् निरंकुश गतिमा अगाडि वढेको भन्दै नागरिकहरुले विकल्पको रुपमा राजा नै देशको साझा हुन सक्ने तर्क पेश गर्न थालेका छन् । देशमा वेथिति र भ्रष्टाचार वढी रहेको छ । महंगीले आकाश छोएको छ । पढेलेखेका युवाहरु दिन प्रतिदिन विदेश पलायन भैरहेका छन् ।
तिनै दलहरु प्रति नागरिकहरु रुष्ट भएको मौका छोपेर पूर्वराजा ज्ञानेन्द्रले पोखरालाई मुकाम वनाएर आसपासका मठमन्दिरको दर्शन गर्ने र जनचासो क्यास गर्ने कोषिश गरिरहेका छन् । पूर्व राजा ज्ञानेन्द्र गत १५ दिनदेखि परिवारका साथ पोखरामा बस्दै आएको राजा निकट श्रोतले जानकारी दिएको छ ।
पछिल्लो समयमा देशका दुइ ठूला दल कांग्रेस र एमाले मिलेर सत्ता चलाएका छन् । सरकारको नेतृत्व गरेका एमाले अध्यक्ष एवं प्रधानमन्त्री केपी शर्मा ओलीलाई अहिले छिमेकी राष्ट्र भारत र चीनले कुनै स्थान दिएको पाइँदैन ।
संसदमा तेश्रो दल भएर पनि पटक पटक सत्ताको रसस्वादन गरेको माओवादी केन्द्र प्रतिपक्षमा देखिन्छ । तर माओवादीको विगतमा कहिले कांग्रेस त कहिले एमाले सँग मिलेर सत्तामा रहेर कुनै परिवर्तनकारी काम नगरेकोले जनविश्वास गुमाएको छ । अर्थात् प्रतिपक्षी वनेर खवरदारी गर्ने हैसियतमा देखिदैन । सत्तालिप्साले माओवादीको गति लुलो भै सकेको छ ।
यहि अवसरमा नागरिकहरुको दलप्रतिको वितृष्णा र पूर्वराजा ज्ञानेन्द्रको सक्रीयताले चर्चा पाएको छ । पूर्व राजा ज्ञानेन्द्र प्रतिको नागरिक मोहले वर्तमान सत्तासीन राजनीतिक दलहरुलाई सच्चिने मौका पनि मिल्ने देखिन्छ । तर दलहरुको व्यवहार हेर्दा सच्चिने छनक भने देखिँदैन । सत्ता प्राप्तिमा रम्ने र गुम्दा सडकमा झरेर गाली लगौचमा उत्रिने वानी परेका पुराना दलका नेताहरुको वानी व्यहोरा परिवर्तन हुन सकेको छैन ।
पूर्व राजा ज्ञानेन्द्रले सत्ता छोडेपछि कहिल्यै उत्ताउलो र भड्किलो सन्देश दिएनन् । तर पछिल्लो समयमा फागुन ७ गते प्रजातन्त्र दिवसको अवसरमा पूर्व राजा ज्ञानेन्द्रले अब हाम्रो बेला आयो, अव हामी टुलुटुलु हेरेर वस्न सक्दैनौं भन्ने सन्देश जारी गरे । त्यो सन्देशले दलप्रति वितृष्णा भएका नागरिकलाई केही राहत मिलेको देखिन्छ । जे जसो भएपनि नेपालमा राजसंस्था फर्काउने खेलमा भारतको हात रहने वताइन्छ ।
भारतीय त्यो सक्रीयताले नेपालका कांग्रेस, एमाले र माओवादी मध्ये कुनै दललाई राजा स्वीकार्न लगाएर नेपालमा राजसंस्था फर्काउने अभिष्ट सिद्ध गर्न सक्ने देखिन्छ ।
यदि भारतको व्याकफोर्समा नै पूर्व राजा ज्ञानेन्द्रको सक्रीयता वढेको हो भने त्यो पनि सफल नहोला भन्न सकिँदैन । नेपाली नागरिकले राजसंस्था चाहेपनि अन्यथा भारत लगायत छिमेकी शक्ति केन्द्रको व्याकफोर्स विना राजाको सक्रीयता वढेको हो भने त्यो फेरि धोका मात्र हुनेछ । राजनीतिक विश्लेषकहरु भन्छन् पूर्व राजा ज्ञानेन्द्र वेला वखत सडकमा आउँछन् सडक मै विलाउँछन् ।