Samaya Dristi

कमल पौडेल अथक
पोखरा २१, साउन
जिल्ला प्रशासन कार्यालय कास्कीले यही साउन २९ गतेसम्म लकडाउन जारी राखेको सूचना जारी गरेको थियो । तर बजारमा लकडाउन जस्तो कहीं कतै छैन । कोरोना महामारी दिन प्रतिदिन वढ्दै गएको छ । समान्य नागरिकले मापदण्ड पालना नगर्नू कुरा वेग्लै छ । तर यहाँ राजनीतिक दलका नेता र मन्त्रीहरुले नै मापदण्ड पालना गरेको पाइँदैन ।
प्रसाशनले जारी गरेको सूचनामा अन्य सवै खोलेर होटल, पार्टी प्यालेस, दोहोरी साँझ, डिस्को डान्स लगायतलाई खोल्न अनुमति दिएको छैन । तर मन्त्रीहरुको सम्मान हुने पार्टी प्यालेस भने निरन्तर खुलिरहेका छन् ।
जहाँ विभिन्न संघ संगठन र राजनीतिक दलका भातृसंगठनहरुले मन्त्रीलाई सम्मान गर्न वोलाउँछन् । अनि मन्त्रीहरु पनि सम्मान खान भन्दै घाँटी धोएर जान्छन् । मन्त्रीका आसेपासे देखि राजनीतिक दलका कार्यकर्ता र अन्य उपस्थित नागरिकहरु ती पार्टी प्यालेसमा कोच्चिएर वसेका हुन्छन् ।
त्यहाँ न कोरोना सर्छ भनिन्छ न त कुनै सामाजिक दुरी र स्वास्थ्य मापदण्ड नै पालना हुन्छ । अहिले पोखरामा यस्तै देखिन्छ । पोखरा उद्योग वाणिज्य संघका पूर्व अध्यक्ष दीपक श्रेष्ठ भन्छन् सरकारले पार्टी प्यालेस खोल्न नदिने तर त्यही पार्टी प्यालेसमा मन्त्रीको सम्मान तामझामका साथ गर्ने परिपाटीले समाजमा कोरोना मौलायो । उनले सरकारले कि सवै खुल्ला छ भन्नु पर्यो होइन भने मन्त्रीका सम्मान हुने पार्टी प्यालेस खोल्न दिने कुरा लापरवाही भयो उनले भने ।
कास्की प्रसाशनले पनि होटल तथा पार्टी प्यालेसलाई खोल्न अनुमति नदिएको कास्कीका प्रमुख जिल्ला अधिकारी थानेश्वर गौतमले वताए । मन्त्रीका कार्यक्रम पार्टी प्यालेसमा गरिएको वारे ध्यानाकर्षण भएको भन्दै मन्त्री जस्तो व्यक्तिले आफै संयमता अपनाउनु पर्ने वताए । उनले मन्त्रीले पनि अरुले नियम पालना गर्नु पर्छ हामीले गर्नु पर्दैन भन्ने जस्तो सोच राख्न नहुने वताए । यो कार्यकालागि आम नागरिकको खवरदारीको खाँचो रहेको उनले वताए ।