Samaya Dristi

कमल पौडेल अथक
पोखरा १२, फागुन
खाद्य प्रविधि तथा गुण नियन्त्रण कार्यालय पोखराले पोखराका केही होटलको अनुगमन गरी स्तरिकरण गरेको छ । होटल संघ हान र रेवानको सहयोगमा ती होटलहरुको अनुगमन गरी स्तरिकरण गरेको हो ।
होटलका प्रतिनिधिलाई अभिभुखिकरण सँगै उनीहरुको आग्रह अनुसार स्तरिकरण गरी लोगो वितरण गरिएको वरिष्ठ खाद्य अनुसन्धान अधिकृत नवराज दाहालले जानकारी दिएका छन् ।
उनले होटलको सरसफाइदेखि खाना पकाउने तेलको गुणस्तरसम्म जाँच गरी स्तरिकरण गर्दा होटल व्यवसायी र उपभोक्ता दुवैलाई फाइदा हुने वताए ।
स्तरिकरण गरिएका ९ वटा होटल मध्ये पोखरा ग्राण्ड, मिड पोइन्ट, माउण्ट कैलाश, प्याराडिसो वार, हिमालय ग्लोरी, म्याजेष्टी लेकफ्रन्ट र टेम्पल ट्री स्पाले उत्तम अर्थात् २ तारा पाएका छन् ।
त्यसैगरी ल्याण्डमार्क प्रालि र वाटर फ्रण्ट रिसोर्टले सन्तोष जनक अथात् १ तारा प्राप्त गरेको खाद्य अनुसन्धान अधिकृत प्रदीप काफ्लेले जानकारी दिएका छन् । उनले होटलका सेफ र मेनेजरलाई होटल किचनका विभिन्न सूचकमा प्रश्न गरी उनीहरुको उत्तर अनुसार मुल्याङकन गरिएको वताए ।
आफ्नो होटलको थप स्तर बृद्धि गर्न आवस्यक ठानेमा होटलले आफूलाई सुधार गरी पुनः निवेदन दिएर फेरि प्रकृयामा जान सक्ने पनि उनले वताएका छन् ।
होटलहरुलाई लोगो र स्टीकर वितरण गर्दै राष्ट्रिय उपभोक्ता मञ्च कास्कीका अध्यक्ष राजेन्द्र लिगलले होटलको सरसफाइ सँगै खानाको गुणस्तरीयता नै पर्यटनको परिचय भएको वताए । उनले पर्यटकीय सहर पोखराका होटलहरुको खानाको गुणस्तर राम्रो छ भन्ने सन्देश आजको आवस्यकता भएको वताए ।
होटल संघ हान पोखराका अध्यक्ष लक्ष्मण सुवेदीले पोखराका होटलहरुको गुणस्तर जाँच गरिएकोमा खुसी व्यक्त गर्दै आगामी दिनमा यस्ता कार्यक्रमलाई सहयोग गर्दै जाने वताए ।
वरिष्ट खाद्य अनुन्धान अधिकृत नवराज दाहालको अध्यक्षतामा भएको रेवानका अध्यक्ष विश्वराज पौडेल, प्रथम उपाध्यक्ष बसन्त गौतम, हानका उपाध्यक्ष गणेश पहारी, राष्ट्रिय उपभोक्ता मञ्च कास्कीका सचिव कमल पौडेल अथक, वडा नं ६ का वडा सदस्य वासुदेव वराल, ल्याण्डमार्क होटलका प्रतिनिधि मिलन श्रेष्ठ लगायतले वोलेका थिए ।