Samaya Dristi

काठमाडौँ,  २८ मंसिर । चीनमा पनि कोभिड–१९ को नयाँ भेरियन्ट ओमिक्रोन भेटिएको छ।

उत्तरी शहर तियानजिङमा पहिलो संक्रमित फेला परेका हुन् । विदेशबाट आएका एक व्यक्तिमा डिसेम्बर ९ गते ओमिक्रोन पुष्टि भएको चिनियाँ अधिकारीले बताएका छन् । हाल क्वारेन्टाइनमा राखेर संक्रमित व्यक्तिको उपचार भइरहेको छ ।

पहिलो पटक दक्षिण कोरियामा पहिचान गरिएको ओमिक्रोन चीनसहित हालसम्म ६० भन्दा मुलुकमा फैलिइसकेको छ । विश्व स्वास्थ्य संगठन (डब्ल्यूएचओ)ले ‘चिन्ताजनक भेरियन्ट’ भनिसकेको ओमिक्रोनबाट बेलायतमा एकजनाको मृत्यु भएको छ ।

ओमिक्रोन कति संक्रामक छ, यसले संक्रमितलाई गम्भीर अवस्थामा पुर्‍याउँछ वा पुर्‍याउँदैन र खोपले काम गर्ने वा नगर्नेबारे अझै पूर्ण विवरण आइसकेको छैन ।

भारतमा……..

भारतमा दुईजनामा कोभिडको नयाँ भेरियन्ट ‘ओमिक्रोन’ पुष्टि भएको छ । कर्नाटक राज्यमा बिहीबार दुईजनामा ओमिक्रोन संक्रमण पुष्टि भएको भारतको स्वास्थ्य मन्त्रालयले जनाएको छ । संक्रमण देखिएकामध्ये ६६ वर्षका पुरुष दक्षिण अफ्रिकाबाट फर्केका र अर्का ४६ वर्षका पुरुष भने स्थानीय रहेको मन्त्रालयको भनाइ छ । संक्रमित दुवैजनामा ज्वरोको लक्षण देखिएको छ । 

भारतमा नयाँ भेरियन्ट देखिएसँगै उच्च सतर्कता अपनाइएको सञ्चारमाध्यमहरूले जनाएका छन् । सबै सहरमा कोभिड परीक्षण तीव्र पारिएको छ । परीक्षणका क्रममा पजिटिभ देखिएकामा जिन सिक्वेन्सिङ भइरहेको छ । योसँगै भारतले आवतजावतमा पनि कडाइ सुरु गरेको छ । बुधबारदेखि लागू हुने गरी भारतले उच्च जोखिम भएका देश बेलायत, दक्षिण अफ्रिका, न्युजिल्यान्ड, बंगलादेश, हङकङ र इजरायलबाट आउने यात्रुलाई कडाइ गर्ने निर्णय गरेको हो । भारतको स्वास्थ्य मन्त्रालयका अनुसार एयरपोर्टमा परीक्षण अनिवार्य गरिने र रिपोर्ट नआउँदासम्म विमानस्थलबाट बाहिरिन रोक लगाइएको छ । 

नेपालमा संक्रमणको जोखिम बढ्यो
हालसम्म ३० देशमा ओमिक्रोन फैलिएको छ । विभिन्न देशका तीन सय ७५ जनामा ओमिक्रोन संक्रमण पुष्टि भएको विश्व स्वास्थ्य संगठनले जनाएको छ । भारतमा कोभिडको नयाँ भेरियन्ट देखिएसँगै नेपालमा संक्रमणको जोखिम बढेको चिकित्सकहरूले बताएका छन् । 

वरिष्ठ सरुवा रोग विशेषज्ञ डा. शेरबहादुर पुनले कोभिडको पहिलो र दोस्रो लहरमा भारतबाट नेपाल भित्रिएकाले यसपटक पनि जोखिम बढ्न सक्ने बताए । अघिल्लोचोटि सीमानाकामा परीक्षणमा कडाइ नगर्दा संक्रमणले महामारीको रूप लिएकाले सावधान रहन अतिआवश्यक भएको उनको भनाइ छ । ‘यो भाइरसबारे अझैसम्म पर्याप्त जानकारी छैन । हरेकपल्ट कोभिडले फरक स्वरूप देखाइरहेकाले यकिन प्रमाण नहुन्जेलसम्म अनुमान गर्न सकिँदैन । तसर्थ, नाका र एयरपोर्टमा परीक्षणको दायरा बढाउनुपर्ने चुनौती थपिएको छ । संक्रमण भित्रिन नदिनु नै अहिलेको मुख्य विकल्प बन्न सक्छ,’ पुनले भने ।

जिन सिक्वेन्सिङ नियमित भइरहे पनि हालसम्म नेपालमा भने ओमिक्रोन पुष्टि नभएको राष्ट्रिय जनस्वास्थ्य प्रयोगशालाले जनाएको छ । स्वास्थ्य मन्त्रालयले भने विदेश भ्रमण नगर्न सुझाव दिएको छ । नयाँ भेरियन्ट नेपाल भित्रिने सम्भावना बढेको भन्दै मन्त्रालयले नाका र एयरपोर्टमा सतर्कता बढाइएको उल्लेख गरेको छ । नयाँ भेरियन्ट भेटिएको मुलुकबाट आउने यात्रुलाई विमानस्थलमै हेल्थ डेस्क राखेर परीक्षण गर्ने र क्वारेन्टिनमा राख्ने क्रम थालिएको मन्त्रालयले जनाएको छ । 

डा. शेरबहादुर पुन : वरिष्ठ सरुवारोग विशेषज्ञ

ओमिक्रोन भाइरसबारे अझैसम्म पर्याप्त जानकारी छैन । हरेकपल्ट कोभिडले फरक स्वरूप देखाइरहेकाले यकिन प्रमाण नहुन्जेलसम्म अनुमान गर्न सकिँदैन । त्यसैले नाका र एयरपोर्टमा परीक्षणको दायरा बढाउनुपर्ने चुनौती थपिएको छ । संक्रमण भित्रिन नदिनु नै अहिलेको मुख्य विकल्प बन्न सक्छ ।